काही हरवलेले नंबर्स
********************
होतं असंही कधी कधी
असतात अशा व्यक्ती काही
ज्या आता फक्त
फोनवरच उरलेल्या असतात
सगळ्या नंबर्सच्या लिस्टमध्ये
आपला रकाना पकडून बसतात.
कधीतरी मेसेज केला जाईल
 ह्या प्रतीक्षेत...
पण खूपदा कसलीच हालचाल नसते
कित्येक दिवसात विचारपूस नसते
बोलणं होत महाग.. आणि
मेसेजशीही कट्टी असते
कधीतरी डीपी बघितला जातो
कधी स्टेटस वाचलं जातं
काही क्षणांसाठी मग
मनातल कवाड उघडलं जातं
घडत तसं काहीच नाही ते...
मिटलही जातं .. पुढच्याच क्षणात
कितीतरी खिडक्या
उघडलेल्या असतात ...ह्या
चॅट नामक  ... गदारोळात
 मग होतात काही स्थित्यंतरं
वाढत जातात अंतरं
न पडलेल्या प्रश्नांना
आपसूक मिळणारी उत्तरं
 फोनच्या लिस्टमधून गायब होतात
नांबर्सची उरली सुरली लक्तरं
आणि तरीही थांग न लागावा
 इतकी अदृश्य अंतरं....
कधीतरी मात्र सूर लागतो
जुना राग आळवावा वाटतो
संवादाचा मिटला पंखा अलवारसा
उलगडावा वाटतो
बोटांनी चाळा करूनही
तो नंबर ...दिसत नसतो
व्यक्ती मनात स्पष्ट तरी
नंबर  बाकी ....रकान्यात नसतो...
हातात थिजून राहिलेला फोन
दमलेली बोटं अन उद्विग्न मन
माणसांना जोडणारा...
दूर करू शकणारा...
माणसाहुनही...
ताकदवान ....फोन
दोष तसा फोनचा नाही,
 अन दोष अंतराचा नाही
दृश्य संबंध जोडू पाहणाऱ्या
अदृश्य अशा तारांचा नाही
काही  जागा...रिकाम्या...
रिकाम्याच राहणार असतात
काही फोननंबर्स...
फक्त ..हरवण्यासाठीच असतात
फक्त ..हरवण्यासाठी !!...
...............
....